PALAS DE REI CELEBRA A XXVI MOSTRA INTERNACIONAL DE TEATRO AMADOR-TEATRO NO CAMIÑO DE SANTIAGO, DO 20 DE AGOSTO  AO 6 DE SETEMBRO

Palas de Rei acolle un ano máis a Mostra Internacional de Teatro Amador – Teatro no Camiño de Santiago, que nesta edición cumpre vinte e seis anos de vida converténdose nunha cita imprescindible no calendario cultural galego.

Companías de Galicia e Cataluña, premios a figuras destacadas e un roteiro teatral pola aldea na nova edición dun festival de referencia

A presentación oficial tivo lugar no Salón de Plenos do Concello, coa presenza do alcalde Pablo Taboada Camoira, da responsable de produción Ana María García Negro e do director de Metátese Teatro, Afonso García Penas. O evento está organizado pola Orde das Donas e Cabaleiros do Priorato de Vilar de Donas – Os Lobos, en colaboración coa Consellería de Cultura, Lingua e Xuventude a través do programa CULTURA NO CAMIÑO, a Área de Cultura da Deputación de Lugo, o Concello de Palas de Rei, Metátese Teatro e Alentía Teatro.

Este ano participarán compañías procedentes de Galicia e Cataluña, cun programa variado que inclúe teatro para todos os públicos, monicreques, comedia, drama e propostas de creación contemporánea. A programación desenvolverase entre o 20 de agosto e o 6 de setembro, en diferentes espazos de Palas de Rei, coa Casa da Cultura como escenario principal, así como a Praza do Concello, o Parladoiro de Arqueixal e a aldea de San Mamede de Coence.

Un programa diverso e para todos os públicos

A Mostra arrinca o mércores 20 de agosto con Títeres Alakrán e a súa obra Barrigaverde ataca de novo, e continuará con agrupacións como o Obradoiro Municipal de Teatro de Palas de Rei (Historias enredadas), Lîlâ Teatro (Abra da cabra), Ses Garbo Girls (Helena vs. Penélope), Zoevixión (Estarei ata o fin), Faro Miño (Intríngulis), Metátese Teatro (O xuízo), GAT Grup d’Aficionats al Teatre (Love Contract), Alentía Teatro (Maleta aberta) ou Anxo Moure (Unha árbore vén vernos).

O broche final chegará o sábado 6 de setembro coa XIV edición de Son d’Aldea, que ofrecerá un roteiro teatral polos camiños, soutos e casas da aldea de San Mamede de Coence, con representacións ao aire libre e o espectáculo A benvida.

Recoñecementos a figuras e colectivos de referencia

A Mostra é tamén un espazo para recoñecer o labor cultural e social. Nesta edición entregaranse tres galardóns:

• XXV Premio Mácara á actriz María Vázquez, pola súa traxectoria interpretativa, a súa versatilidade e compromiso co teatro galego. O xurado destacou a súa excelencia técnica, a conexión emocional co público e o seu papel como embaixadora das artes escénicas galegas.

• XX Premio Careón ao escritor e investigador Xosé María Lema Suárez, pola defensa da lingua galega, a calidade da súa obra literaria, a posta en valor do patrimonio, o compromiso co mundo rural e a súa intensa labor divulgativa.

• VIII Premio Garabato á Conservación do Patrimonio (en homenaxe a Gabriel Barreiro Toural) ao Foro Galego de Inmigración, en recoñecemento á defensa dos dereitos humanos, o acompañamento e integración das persoas migrantes, o labor social continuado e a súa contribución a unha Galicia diversa, aberta e solidaria.

Un festival con proxección internacional

Desde a súa creación, a Mostra de Teatro Amador de Palas de Rei acolleu máis de 300 compañías galegas e unha trintena de agrupacións de España e do estranxeiro, con participación de países como Cuba, México, Rusia, Portugal, Francia ou Venezuela. A súa integración en FETEAGAL (Federación Teatral Afeccionada de Galicia) e ESCENAMATEUR garante cada ano unha programación de calidade, con espectáculos nacionais e internacionais.

Todas as funcións son de entrada libre ata completar aforo.

Máis información:

???? http://teatrometatese.blogspot.com.es/