XVIII FESTIVAL GALEGO DE TEATRO ESCOLAR DE PALAS TEATRO COMO FERRAMENTA DE APRENDIZAXE, DE INTERCAMBIO E DE SOLIDARIEDADE, O 18 DE ABRIL

Palas de Rei, 13, 04, 2026.- Presentouse esta mañá ás 9:30 horas no Salón de plenos do Concello de Palas de Rei o XVII FESTIVAL DE TEATRO ESCOLAR DE PALAS DE REI que se celebrará o sábado, 18 de abril, na aldea de Santiago de Albá e na Casa de Cultura de Palas de Rei.

Este evento está organizado polo CONCELLO DE PALAS DE REI, o OBRADOIRO MUNICIPAL DE TEATRO DE PALAS DE REI, a ASOCIACIÓN CULTURAL PALACIO DO REI, a ASOCIACIÓN CULTURAL DE SANTIAGO DE ALBÁ, “O PARZAMIQUE”; ARQUEIXAL, a CORAL POLIFÓNICA DE PALAS DE REI, METÁTESE TEATRO e ALENTÍA TEATRO.

Na presentación participaron o Alcalde desta vila, Pablo Taboada Camoira; Javier Gómez Vázquez; presidente da Asociación Cultural Palacio do Rei; María José Mourenza García, Ana García Negro, Óscar Varela Casal e Afonso García Penas en representación de Metátese Teatro e Alentía Teatro.

Participarán nesta xornada cultural máis de cen actores e actrices de tres Aulas de Teatro de diferentes puntos xeográficos de Galicia (Palas de Rei, Touro e Teo). O programa deste Festival é o seguinte:

Haberá un roteiro teatral, musical e poético ás 16:00 horas na aldea de Santiago de Albá, que estará protagonizado por alumnado, familias e profesorado do Obradoiro Municipal de Teatro de Palas e pola Asociación Cultural Palacio do Rei, A Coral Polifónica de Palas, a Asociación Cultural de Santiago de Albá “O Parzamique”, Metátese Teatro e Alentía Teatro.

Este roteiro combinará música, teatro, poesía e xogos e persegue varios obxectivos: achegar diferentes xéneros teatrais á poboación, a interrelación entre persoas de diferentes idades e localidades, a aproximación do alumnado ao mundo rural e a súa posta en valor, a transmisión do tecido cultural das xeracións que nos precederon, a posta en práctica dunha educación inclusiva e adapatada á diversidade do alumnado. O punto de partida será a IGREXA de Santiago de Albá e percorrerá diversos carreiros e espazos da aldea.

Ás 19:00 horas, na Casa de Cultura de Palas, O Obradoiro Municipal de Teatro de Palas de Rei, a Aula de Teatro do CPI Fonte Díaz de Teatro e A Aula de Teatro do IES de Cacheiras porán en escena o espectáculo MODO AVIÓN.

Unha viaxe cómica, sensíbel e hiperrealista pola vida diaria da infancia, da adolescencia e persoas adultas atrapadas entre o ritmo acelerado do mundo actual, a tecnoloxía e as esixencias do perfeccionismo. Cada escena constrúe un pequeno universo teatral onde se mesturan o humor, a retranca e a reflexión: dende o bulicio das redes sociais e os “trends” imposibles, ata situacións cotiás cheas de fantasía, conflitos interpersoais, aventuras inesperadas e pequenas grandes loitas por atopar o propio lugar no mundo.

Entre bailes, xogos, música, personaxes sorprendentes e momentos de emoción compartida, os protagonistas descobren que a vida é cambiante e imprevisible, que as prioridades poden transformarse en calquera instante e que, ás veces, o máis importante é saber parar, respirar e mirar arredor. Activar o modo avión convértese así nun xesto simbólico: desconectar do ruído, escoitarse a un mesmo, rir dos erros e aceptar que a imperfección tamén forma parte da aprendizaxe.

Un espectáculo dinámico, coral e profundamente humano, que combina teatro, expresión corporal e linguaxe musical para celebrar a creatividade, a cooperación e a capacidade de superación do alumnado. Unha proposta escénica que convida ao público a reflexionar, emocionarse e compartir unha experiencia colectiva chea de enerxía, ilusión e esperanza.

Este Festival permite que o alumnado das tres Aulas de teatro interactúe e propicia que amose conxuntamente o traballo realizado durante o curso teatral que se desenvolve ao longo do curso académico 2025/26 nas tres localidades; ademais de integrar a persoas con diferentes capacidades, de intercambiar experiencias e traballar conxuntamente nun obxectivo común: a posta en escena dunha obra teatral. Insírese dentro dunha xira de funcións que comezou o día 4 de febreiro no Teatro Principal de Ourense, continuou en Touro o 28 de febreiro e seguirá en Nîmes, Pisa, Boloña e Teo.

O teatro escolar constitúe, ademais, unha ferramenta pedagóxica de primeiro orde: favorece a expresión oral e corporal, a escoita activa, o traballo cooperativo e o pensamento crítico; converte o erro en oportunidade de aprendizaxe e promove a educación emocional. A través da creación escénica, o alumnado desenvolve competencias comunicativas e sociais que transcenden a aula, reforza a autoestima e aprende a habitar a diversidade como riqueza. Neste Festival, a inclusión non é un lema senón unha práctica: persoas con diferentes capacidades participan en igualdade de condicións, adaptando linguaxes, ritmos e espazos para que todas as voces conten e sexan escoitadas. O resultado é unha comunidade educativa máis cohesionada e aberta ao mundo.